တကိုယ်ကောင်းမဆန်
တကိုယ်သန်မရှု
အခက်အခဲတွေ တို့မမှု
ညီညွတ်ခြင်းသည် အင်အားစု
ကျသည့် တာဝန် ကျေပွန် အခု
ဤသည်ပင် ရပ်ပြု ရွာပြု
ဤသည်ပင် မြို့ပြု နယ်ပြု
ဤသည်ပင် တိုင်းပြု ပြည်ပြု။
ဤသည်ပင် အများချမ်းသာမှု။
နုနယ်တဲ့ ကလေးအရွယ်တုန်းက ဆရာသမားက ချပေးလို့ နောက်က လိုက်ဆိုခဲ့ရတဲ့ ကဗျာလေးပါ။ ဘာရယ်လို့ အဓိပ္ပါယ် လေးလေးနက်နက် မသိခဲ့ပါဘူး။ ရင့်ကျက်တဲ့ အရွယ် ရောက်လာတော့ ‘ညီညွတ်တယ် ဆိုတာ ဘာလဲ’ ဆိုတဲ့ မေးခွန်းကို မေးကြည့်ပါတယ်။ မြတ်စွာဘုရားရှင် ကိုယ်တော်မြတ်ကြီးက ‘ သမဂ္ဂါနံ တပေါ သုခေါ - ညီညွတ်သူတို့ရဲ့ လုပ်ဆောင်ချက်(အကျင့်) သည် ချမ်းသာကြောင်း’ လို့ ဟောကြားတော်မူပါတယ်။ အဲလိုဆိုရင် လောကမှာ ချမ်းသာချင်ရင် ညီညွတ်ရမယ်၊ ညီညွတ်မှ ချမ်းသာမယ်။ မညီညွတ်ရင် ဆင်းရဲမယ်လို့ အဖြေထွက်ပါတယ်။
ညီညွတ်တယ် ဆိုရာမှာ ကိုယ် ညီညွတ်မှု ( ကာယသာမဂ္ဂီ) စိတ်ညီညွတ်မှု (စိတ္တသာမဂ္ဂီ) လို့ ဆိုပြီး ၂ မျိုး ရှိပါတယ်၊ အဲသည် နှစ်မျိုးမှာ စိတ်ညီညွတ်မှု က ပို အရေးကြီးပါတယ်။ စိတ်ထားတွေ ညီညွတ်မှု မရှိရင် မချမ်းသာနိုင်ပါဘူး။ တစ်ဦးနဲ့ တစ်ဦး လက်ဆွဲနုတ်ဆက်နေရုံ၊ စားပွဲတစ်ဝိုင်းတည်းမှာ အတူတကွ ထိုင်နေတာကို ကြည့်ရုံနဲ့ ညီညွတ်တယ် ပြောလို့ မရပါဘူး။ လူချင်း တစ်နေရာတည်း နေကြပေမယ့် စိတ်ထဲက တင်းနေကြတာမျိုး၊ တစ်ဝိုင်းတည်း ထိုင်စကားပြောနေကြပေမယ့် အတွင်းမှာတော့ ကြိတ်ဆဲနေတတ်တာမျိုးတွေ ဖြစ်တတ်ပါတယ်။ လက်အုပ်ချီတိုင်း ချစ်လွန်လွန်း ရိုသေလွန်လွန်းလို့ ပြောလို့ရမယ် မထင်ပါဘူး။ မတတ်သာလို့ တာဝန်ဝတ္တရားအရ လုပ်နေတာမျိုးလည်း ဖြစ်နိုင်ပါသေးတယ်။ စိတ်ချင်း ညီညွတ်မှသာ အတူတကွလုပ်ဆောင်ကြတဲ့ လုပ်ငန်းတိုင်းမှာ အောင်မြင်ပါတယ်။ ဟန်ဆောင် အပြုအမူ ၊ ဟန်ဆောင် အပြောအဆိုတွေဟာ ညီညွတ်မှုရှိသယောင် ဟန်ဆောင်ထားတဲ့ မာယာပါ။ ပင်ပန်းလွန်းလှတယ် ဆိုတာ ခံစားဘူးသူတိုင်း သိနိုင်ပါတယ်။
အများအကျိုး ကို ဆောင်ရွက်ရတဲ့ ပရဟိတ အသင်းမှာပဲ ဖြစ်စေ၊ မိသားစု အတွင်းမှာပဲဖြစ်စေ၊ တစ်အိမ်ထဲ၊ တစ်ကျောင်းထဲ၊ တစ်တိုက်ထဲမှာပဲ ဖြစ်စေ၊ နောက်ဆုံး တစ်တိုင်းပြည်လုံးမှာပဲ ဖြစ်စေ စိတ်ထားတွေ ညီညွတ်နေကြရင် ချမ်းသာကြမှာပါ။ ကိုယ် နုတ် စိတ် သုံးပါးလုံး ညီညွတ်မယ် ဆိုရင်တော့ အတိုင်းထက် အလွန် တံခွန်နဲ့ ကုက္ကားဆိုသလိုပေါ့၊
အသင်းအဖွဲတွေ၊ မိသားစုတွေ၊ တစ်အိမ်တည်း အတူနေတဲ့ မိတ်ဆွေ သူငယ်ချင်းတွေ၊ တစ်ကျောင်းထဲ အတူနေတဲ့ ရဟန်းသံဃာ သူငယ်ချင်းတွေအကြားမှာ ဘာကြောင့် မကြာခဏ အကွဲအပြဲ ဇာတ်လမ်းတွေ ကြားနေရတာလဲ ဆိုတာ စဉ်းစားဘူးပါတယ်။ အဖြေက တော့ ညီမျှခြင်းတွေ မရှိလို့ပါ။ ညီမျှမှ ညီညွတ်ပါတယ်။ ညီအောင် ညှိယူရပါတယ်။ ညီအောင် ညှိယူတတ်တဲ့ စိတ်ထားးဟာ အင်မတန်မွန်မြတ်တဲ့ ကိုယ်ချင်းစာတရား၊ မေတ္တာတရားပါ။ ဗုဒ္ဓဘာသာ မြန်မာ လူမျိုးများဟာ ကိုယ် အားထုတ်ရှာဖွေထားတဲ့ ကုသိုလ်ကောင်းမှုကိုတောင်မှ ပတ္တိဒါနအဖြစ် သူများကို မျှဝေပေးတတ်ကြသေးတာပဲ။ မိမိနဲ့ အတူနေဘက်၊ အလုပ်လုပ်ဘက်တွေကို ဘာလို့ ညီမျှတဲ့ အခွင့်ရေး မပေးတတ်ကြတာလဲဆိုတဲ့ မေးခွန်းကို တွေးကြည့်တော့ လုပ်ငန်းဆောင်ရွက်ရာမှာ ကိုယ်ကျိုးကြည့် အတ္တကို ရှေ့တန်းတင်နေကြလို့ဆိုတာကို တွေ့ရပါတယ်။ အများအကျိုး ဆောင်ရွက်တယ် ဆိုတာ အများစိတ်ချမ်းသာဘို့ပါ၊ ငါတစ်ယောက်တည်း ချမ်းသာဘို့ မဟုတ်ပါဘူး။ အများစိတ်ချမ်းသာမှ ရည်ရွယ်ချက်ပြည့်ပါတယ်၊ ငါတစ်ယောက်တည်း ချမ်းသာရုံနဲ့ ရည်ရွယ်ချက် မပြည့်ပါဘူး။ တကယ်တော့ အဲဒီငါလည်း ကြာကြာ စိတ်ချမ်းသာမယ် မထင်ပါဘူး။
အသင်းအဖွဲ့တွေမှာ ‘ငါသာ ထင်ပေါ်စေ’ “ ငါသာ မျက်နှာရစေ’ ‘ငါသာ ချမ်းသာစေ’ ဆိုတဲ့ အတွေး၊ သာသနာလောကမှာလည်း ‘ ငါ့ကိုသာ အရို အသေ အလေးမြတ်ပြုစေ’ ‘ ငါ့ကိုသာ လူသိများစေ’ ‘ ငါသာ ထင်ပေါ်စေ’ ‘ငါ့ကိုသာ အထင်ကြီးစေ’ ‘ငါ့ကိုသာ လှူဒါန်းစေ’ စတဲ့ အတွေးတွေဟာ အစွန်းထွက်တဲ့ မညီမျှတဲ့ အတွေးတွေလို့ ပြောလို့ရပါတယ်။ ဒါဟာ လောဘ အတ္တ စတဲ့ အကုသိုလ် အပင်ကနေ သီးလာတဲ့ အကုသိုလ်အဆိပ်သီးတွေပါ။ အဲလို မညီမျှတဲ့ လုပ်ရပ်တွေရှိနေသမျှ ညီညွတ်မှုတွေ ဝေးနေမှာပါ။ ညီညွတ်မှုတွေ ဝေးနေသမျှ လောကီချမ်းသာ လောကုတ္တရာချမ်းသာဆိုတာ ဆုတောင်းနေရုံ၊ စကားလုံးလေးတွေ အဖြစ် နဲ့ စာအုပ်ထဲမှာပဲ ပုန်းနေရုံမျှပါပဲ၊ ချမ်းသာမှုကို တကယ်လက်တွေ့ ခံစားရမှာတော့ မဟုတ်ပါဘူး။
အများနဲ့ နေထိုင်တဲ့ နေရာမှာ ကိုယ်လုပ်ချင်တာ လုပ်မယ်ဆိုတဲ့ စိတ်ထားမျိုးထက် ညီညွတ်မှုကို ရှေးရှုပြီး အများနဲ့ share လုပ်တတ်တဲ့ စိတ်ထားမျိုး ထားနိုင်ဘို့က ပိုခက်ပါတယ်။ အကြိုက်တူ အစွမ်းတူတဲ့ နေရာမျိုးတွေမှာ တန်းတူ ညီမျှသော အခွင့်အရေးကို ပေးတတ်တာဟာ သူတော်ကောင်းတွေရဲ့ စိတ်ထားပါ။ တစ်ဦးနဲ့ တစ်ဦးအကြားမှာ မေတ္တာဓာတ်လွှမ်းခြုံထားတဲ့ အတွက် အေးချမ်းပါတယ်။ မြတ်စွာဘုရားရှင် ကိုယ်တော်တိုင်ကလည်း ‘ ယာဝကီဝဉ္စ ဘိက္ခဝေ ဘိက္ခူ အဘိဏှံ သန္နိပါတာ သန္နိပါတဗဟုလာ ဘ၀ိဿန္တိ၊ ၀ုဒ္ဓိယေ၀ ဘိက္ခဝေ ဘိက္ခူနံ ပါဋိကင်္ခါ၊ နော ပရိဟာနိ’ အချင်းချင်း အမြဲမပြတ် စည်းဝေးတိုင်ပင် ညှိနှိုင်းမှုပြုတာဟာ တိုးတက်ကြီးပွါးကြောင်း ဖြစ်တယ်- လို့ ဟောကြားထားပါတယ်။ အဲလို ညီမျှတဲ့ စိတ်ထားမျိုးနဲ့ ညှိနှိုင်းတိုင်ပင် စည်းဝေးမှု မပြုနိုင်ကြလို့ အချင်းချင်း စိတ်ဝမ်းကွဲသွားကြတဲ့ အဖြစ်အပျက်တွေဟာ လက်ချိုးရေလို့ မရအောင်ကို များပါတယ်။
မိမိတို့ ကျေးဇူးရှင် ဆရာသမားတစ်ပါး ဆုံးမဘူးတဲ့ ဆောင်ပုဒ်လေးတစ်ခု ရှိပါတယ်။ ‘အများနဲ့ ငါ၊ ယှဉ်သောခါ၊ အများအကြိုက် ဖြစ်စေမည်’တဲ့။ အင်မတန် အတုယူစရာကောင်းတဲ့ သူတော်ကောင်း စိတ်ထားလေးပါ။ ငါ့အလို ငါ့အကြိုက်သာ ဖြစ်စေရမယ် ဆိုရင် အားလုံး ဆင်းရဲကုန်မှာပါ။ အများနဲ့ ယှဉ်လာတဲ့ ကိစ္စမှန်သမျှကို အများအကြိုက် ဖြစ်စေတာဟာ ညီညွတ်ကြောင်း ချမ်းသာကြောင်းပါ။
ဗုဒ္ဓဘာသာမြန်မာလူမျိုးအများစုဟာ အသိဥာဏ်ပညာ ရင့်ကျက်လာတဲ့နဲ့အမျှ အလုပ်နှစ်ခု လုပ်လေ့ရှိပါတယ်၊ လောကီကြီးပွါးတိုးတက်ရေးနဲ့ လောကုတ္တရာကြီးပွါးတိုးတက်ရေးပါပဲ။ လောကုတ္တရာကြီးပွါးတိုးတက်ရေးဆိုတာကလည်း ယခုခေတ်ပြောနေကြတဲ့ သာသနာတော်မြတ်ကြီး စည်ပင် ပြန့်ပွါး ထွန်းကားရေးပါပဲ။ လောကီတိုးတက်ကြီးပွါးရေးလုပ်ရာမှာ များသောအားဖြင့် အကုသိုလ်ဖြစ်စရာ အာရုံတွေ ပတ်ဝန်းကျင်တွေ ခြံရံထားတာမို့ လောဘ ဒေါသတွေ အတ္တ မာနတွေ မနာလိုမှုတွေ ဖြစ်ကြတာ မဆန်းပါဘူး။ ပစ္စည်း ဥစ္စာရှာဖွေကြတဲ့သူတွေရဲ့ အဓိက ရည်ရွယ်ချက်က ဘ၀မှာ ဖြစ်ပေါ်လာတတ်တဲ့ စား ၀တ် နေရေး ကျန်းမာရေး စတဲ့ အခက်အခဲတွေကို ဖြေရှင်းနိုင်ဘို့ပါ။
လောကုတ္တရာတိုးတက်ကြီးပွါးရေးဆိုတာက အဲဒါတွေရဲ့ ဆန့်ကျင်ဘက် ကုသိုလ်ကောင်းမှုကို ရှာကြတာပါ။ ပိုက်ဆံရှာတာလည်း မဟုတ်ပါဘူး၊ နာမည်ကြော်ကြားမှုကို ရှာတာလည်း မဟုတ်ပါဘူး။ ကုသိုလ်ရှာတဲ့ နေရာမှာ အဲလို လောကီမျှော်လင့်ချက်တွေနဲ့ ရောထွေးသွားပြီဆိုရင် ကုသိုလ်ဖြစ်ဘို့အခွင့်အလမ်းတွေ ဆုံးရှုံးသွားတတ်ပါတယ်။ ပန်းတိုင်နဲ့ လမ်း လွဲသွားပါပြီ။ ကုသိုလ်ရှာရင် ကုသိုလ်ရနေဘို့ အရေးကြီးပါတယ်။ ကုသိုလ်ရဲ့ ဆန့်ကျက်ဘက် အကုသိုလ်တွေသာ ရနေမယ်ဆိုရင် ‘ဖြူချင်လို့ ဖွပ်ခါမှ ပိုညစ်’ ဆိုသလို အင်မတန်ဝမ်းနည်းစရာကောင်းပါတယ်။
အများနဲ့ လုပ်ငန်းလုပ်ကြတဲ့ နေရာမှာ ‘ဆွမ်းဆန်ထဲ ကြက်ချေးရော’ ဆိုသလို အတ္တရှေ့တန်းတင် ကိုယ်ကျိုးကြည့်တတ်သူတွေကလည်း အနည်းနဲ့ အများဆိုသလို ပါလာတတ်တာကလည်း ထုံးစံပါ။ အဆိုပါ လူစားမျိုးတွေဟာ လူသားအဖွဲ့အစည်းမှာတင် ရှိတာမဟုတ်ပါဘူး။ သာသနာအဖွဲ့အစည်းတွေမှာလည်း ရှိတတ်ပါတယ်။ အဲလိုလူမျိုးတွေကြောင့် အများတကာ စိတ်ဆင်းရဲရတတ်ပါတယ်၊ အဲလိုလူမျိုးတွေဟာ ပရိသတ်ကြားမှာ၊ အဖွဲ့အစည်းတွေရဲ့ အကြားမှာ အကုသိုလ် ဖုန်မှုံတွေကို ကြဲချတတ်တဲ့ သူတွေလို့ ဆိုရမှာပါ။
‘သေအောင် လုပ်ရမယ့်နေရာ၊ ပင်ပန်းရမယ့် နေရာဆိုရင် တပည့်တော်တို့ချည်းပဲ၊ အခန့်သား စားရသောက်ရမယ့်နေရာ၊ ပေါ်လွင်မယ့် နေရာဆိုရင် သူတို့ချည်းပဲ၊ တပည့်တော်တို့ကို သတိရဖော်တောင်မရဘူး၊ အလကား နှမ်းဖြူးတွေ’ ရင်းနှီးတဲ့ ဒကာမ လေး တစ်ယောက်က လျှောက်ဘူးတဲ့ စကားပါ။
‘ဦးဇင်းရာ၊ ပရိသတ်များတဲ့ အချိန်၊ ချမ်းသာသူတွေများတဲ့ အချိန်ကျတော့ အား အား ၊ မအားအား သူတို့ကိုယ်တိုင် တရားဟောတယ်၊ ပရိတ်သတ်လေး ချောက်တီးချောက်ချက် ရှိတဲ့ အခါမျိုးကျမှ တပည့်တော်ကို ဟောခိုင်းတယ်၊ အဲဒါမျိုးတွေ အကြိမ်ပေါင်းများလာတော့ တပည့်တော်ကို မနေစေချင်လို့ အနုနည်းနဲ့ ပ ထုတ်နေတာပဲ လို့ အောက်မေ့တယ်၊ အဲလိုပဲ ခံစားရတယ်၊ အခု တပည့်တော် အဲသည်နေရာကို မပြန်ချင်တော့ဘူး၊ အပြီးထွက်လာခဲ့တယ်။ လောလောဆယ် နေစရာလည်း မရှိဘူး၊ ရွာပြန်ပြီး လူဝတ်လဲချင်စိတ်တောင် ပေါက်နေတယ်’။
ထင်ရှားတဲ့ ဘာသာရေးအဖွဲ့အစည်းဌာနတစ်ခုမှာ အစွမ်းတွေရှိနေပါလျက်နဲ့ နေရာပေးမခံရလို့ စိတ်ပျက်နေရှာတဲ့ သူငယ်ချင်းတစ်ပါးရဲ့ ရင်ဖွင့်သံပါ။ ပညာရေးကော စိတ်နေစိတ်ထားပါ ကောင်းတဲ့သူမို့ ပြောတဲ့အတိုင်း တကယ်လုပ်သွားရင် သာသနာတော်အတွက် အရည်အချင်းရှိတဲ့ သာသနာပြု ရဟန်းတစ်ပါး ဆုံးရှုံးသွားမှာကို နှမြောမိပါတယ်။
အဆိုပါ ဖြစ်ရပ်တွေဟာ မညီမျှမှုကနေ ဖြစ်ပေါ်လာတဲ့ မညီညွတ်မှုတွေပါ။ မိမိတို့တစ်တွေ သူများအပေါ်မှာ ညီမျှတဲ့ ကိုယ်ချင်းစာစိတ် မေတ္တာစိတ်ထားလေးတွေ ဘယ်လောက်ထားဘူးခဲ့ကြပြီလဲ ဆိုတာ အားမနာတမ်း ဝေဘန်ဆန်းစစ်ဘို့ လိုအပ်ပါတယ်။ တစ်ဦးနဲ့ တစ်ဦး မေတ္တာကူးမှလည်း ညီညွတ်မှုဆိုတာ ရှိပါတယ်။ ‘ ညီညွတ်ရေးနဲ့ အသက်ရှည်ရှည် ခင်ခင်မင်မင် လက်ရည်တပြင်တည်း ရှေးကတော့ ပိုချစ်ကြတယ်’ လို့ နန်းတော်ရှေ့ ဆရာတင် က လည်း ညီညွတ်မှုဟာ မေတ္တာတရားအခြေခံကြောင်းကို အနုပညာနဲ့ ပညာပေးခဲ့ဘူးပါတယ်။
ညီမျှခြင်းတွေ ရှိနေရင်တော့ ညီညွတ်ခြင်း၊ ချမ်းသာခြင်း ဆိုတဲ့ အကျိုး ရလဒ်တွေ ခံစားရမှာပါ။ညီမျှခြင်းတွေ မရှိသရွေ့တော့ ညီညွတ်ဘို့အရေး ဝေးနေကြအုံးမှာပါ။ ညီညွတ်မှု မရှိရင် ကြီးပွါးချမ်းသာရေး လည်း ဝေးနေအုံးမှာ- ဖြစ်တာကြောင့် ရပ်ရွာအရေး တိုင်းပြည်အရေး လူမျိုးဘာသာ သာသနာ အရေး စတဲ့ ပရဟိတ လုပ်ငန်းတွေကို ဆောင်ရွက်ရာမှာ ညီမျှတဲ့ မေတ္တာစိတ်နဲ့ အတူတကွ လုပ်ဆောင်ကြဘို့ အင်မတန်မှ အရေးကြီးကြောင်းကို တွေးမိမြင်မိ သလောက် မျှဝေလိုက်ရပါတယ်။
0 comments:
Post a Comment